බොහෝ ළමා දූෂකයන් පවුලේ ඥාතීන් හෝ හිතවතුන්

පසුගිය අගෝස්තු මාසයේ දරුවකු ප්‍රසූත කළ දස හැවිරිදි දැරියක් දූෂණය කරනු ලැබ තිබෙන්නේ එම දැරියගේ මාමාවරුන් දෙදෙනකු විසින් යයි ඉන්දියානු උසාවියක් තීන්දු කර ඇත.

කඩිනමින් විසඳිය යුතු නඩුවක් හැටියට ගනිමින් එම අපරාධය විභාග කළ විශේෂ උසාවිය, චූදිත මාමාවරුන් දෙදෙනා දැරිය දූෂණය කිරීම සම්බන්ධයෙන් ඉදිරිපත්ව ඇති චෝදනාවලට වරදකරුවන් යයි තීන්දු කරමින් ඔවුන්ට දඬුවම් නියම කරනු ලැබීම බ්‍රහස්පතින්දාට කල් තැබීය.

එම කුඩා දැරිය ගැබ් ගෙන ඇති බව ඇයගේ දෙමව්පියන් පසුගිය ජූලි මාසයේ මැද භාගයේ දැන ගෙන ඇත්තේ 'බඩ රිදීමක්' පිළිබඳව සිය දියණිය පැමිණිලි කිරීමෙන් අනතුරුව රෝහලට ඇතුළත් කරන ලද අවස්ථාවේය.

දැරිය දූෂණය කිරීම සම්බන්ධයෙන් ඇයගේ වැඩිමහල් මාමා පළමුවෙන් අත්අඩංගුවට ගත් අතර ඔහුගේ DNA බිළිඳා සමඟ නොගැලපුණ හෙයින් දෙවැනි මාමාත් අත්අඩංගුවට ගනු ලැබුණි.

අදාළ නඩු විභාගය අවසානයෙහි විත්තිය වෙනුවෙන් සඳහා වන නීති තර්ක ඉදිරිපත් කරනු ලැබීම සඳුදා (ඔක්තෝබර් 30) නිම වූ අතර, අඟහරුවාදා ප්‍රකාශයට පත් කරන ලද අධිකරණ තීන්දුවේ නිගමනය වුණේ "මාමාවරුන් දෙදෙනාම බාල වයස්කාර දැරිය දූෂණය කිරීමේ චෝදනා වලට වරද කරුවන්" වන බවයි.

දස හැවිරිදි දැරිය දූෂණය කරනු ලැබීමේ අපරාධය සති කීපයක්ම ඉන්දියාවේ සහ ජාත්‍යන්තර මාධ්‍යයන්හි ප්‍රධාන මාතෘකාවක් බවට පත් විය.

දැරිය ගැබ් ගෙන ඇති බව දැන ගැනීමෙන් අනතුරුව ගබ්සාවක් සඳහා අධිකරණ අනුමැතිය ඉල්ලා සිටියත් කළලයට සති තිහක් කල් ගතව ඇති හෙයින් එය ගබ්සා කිරීමට 'චන්දිගාර්' ප්‍රාන්ත උසාවියෙන් අවසර නොලැබුණි.

වෛද්‍ය මණ්ඩලයක නිගමනය වුණේත් ගබ්සාවක් සිදු කරනු ලැබීම 'දැරියගේ ජීවිතයට අනතුරුදායක' විය හැකි බවය.

අනතුරුව ඒ සඳහා ශ්‍රේෂ්ඨාධිකරණයේ අවසරය අයැද සිටියත් එම ඉල්ලීමත් ප්‍රතික්ෂේප කෙරිණ.

ගැබ් ගැනීමක් මවගේ ජීවිතයට අනතුරක් යයි වෛද්‍යවරුන් විසින් නිගමනය කරනු ලබන අවස්ථාවක හැර සති විස්සකට වඩා කල්ගත කළලයක් ගබ්සා කරනු ලැබීමට ඉන්දියානු නීතියෙන් අවසර නොලැබෙයි.

ඉහත කී නඩුවට අදාළ දැරිය තමා ගැබ් ගෙන ඇති බවක් තේරුම් ගෙන නොසිටි අතර 'ගලක් සිර වී ඇති හෙයින්' සිය උදරය නෙරා ඇති බවක් ප්‍රකාශ කර ඇතැයි දිල්ලි අගනුවර බීබීසී වාර්තාකාරිනී ගීතා පාන්ඩේ පවසයි.

පසුගිය අගෝස්තු මාසයේ දැරිය බිලිඳකු ප්‍රසූත කළ අතර එම බිලිඳා හදා වඩා ගැනීම ළමා ශුභසාධක නිලධාරීන්ට පවරා ඇත.

පොලිසියට දුන් මුල් කට උත්තරවල දී අදහස් දැක්වූ දැරිය, සිය පළමු මාමා විසින් පසුගිය මාස හතක පමණ කාලයක් ඇතුළත අවස්ථා කීපයක්ම තමා අපහරණය කරන ලද බව කියා සිටියාය.

එම මාමා වයස අවුරුදු හතළිහක තැනැත්තෙකි.

වීඩියෝ දර්ශන ඇසුරින් උසාවියට පිළිතුරු දුන් දැරිය ඇය අපහරණය කළ මාමා නිවැරදිව නම් කරමින් එම අපචාරය සිදු කෙරුණ ආකාරයත් විස්තර කළාය.

දැරියගේ පියා බීබීසියට අදහස් දක්වමින්, පළමුව අත්අඩංගුවට ගන්නා ලද මාමා ඔහුට එරෙහි චෝදනා ප්‍රතික්ෂේප නොකරන බව කියා සිටියේය.

එම පුද්ගලයා ඔහුට එරෙහි චෝදනා පිළිගත් බව පොලිසියත් පවසයි.

එහෙත් DNA පරීක්ෂණ අනුව ඔහු බිලිඳාගේ පියා නොවේ.

අනතුරුව දෙවැනි මාමා අත්අඩංගුවට ගෙන ඇති අතර DNA පරීක්ෂණයක් අනුව බිළිඳාගේ පියා ඔහු බව තහවුරු විය.

මේ අනුව මාමා වරුන් දෙදෙනාම දැරිය අපහරණය කර ඇති බව සනාථ විය.

දූෂණය කිරීම් වලට ගොදුරු වූ කාන්තාවන් ගබ්සා කිරීම් සඳහා අවසර ඉල්ලමින් පසුගිය මාස කීපය ඇතුළත බොහෝ පෙත්සම් යොමු කරන ලද බව ඉන්දීය අධිකරණ වාර්තා මගින් පැවසෙයි.

දූෂණය කිරීම් නිසා ගැබ් ගනු ලබන බාල වයසේ දැරියන් පිළිබඳව දැන ගැනීමට ලැබීම ප්‍රමාද වන්නේ එම දැරියන්ට තමන් පත් තත්වය පිළිබඳව දැනුමක් නොමැති කම හේතුවෙනි.

පසුගිය සැප්තැම්බර් මාසයේ සති තිස් දෙකක් කල්ගත දරු ගැබක් සෞඛ්‍ය හේතූන් මත ගබ්සා කිරීමට ඉන්දීය ශ්‍රේෂ්ඨාධිකරණයෙන් අවසර ලැබුණි.

අනතුරුව දැරිය 'සිසේරියන්' සැත්කමක් මගින් පුතකු ප්‍රසූත කළත් එම බිලිඳා ජීවත් වුණේ දවස් දෙකක් පමණි.

සිය සුළු පියා විසින් දූෂණය කිරීම නිසා ගැබ් ගත් තවත් දස හැවිරිදි දැරියක් පිළිබඳව පසුගිය මැයි මාසයේ උතුරු ඉන්දියාවේ 'හර්යානා' ප්‍රාන්තයෙන් වාර්තා විය.

ඒ පිළිබඳව දැන ගන්නා විට දරු ගැබට සති විස්සක් ගතව ඇතැයි වෛද්‍යවරු තීන්දු කළ අතර එය ගබ්සා කිරීමට අවසර ලැබුණි.

ඉන්දියානු වාර්තා අනුව සෑම මිනිත්ති 155 කට වයස අවුරුදු දහසයට අඩු ළමයකු දූෂණය කෙරෙයි.

සෑම පැය දහතුනකට වයස අවුරුදු දහයට අඩු ළමයකු දූෂණය කෙරෙයි.

2015 වසරේ දසදහසකට අධික ළමා දූෂණ වාර්තා වී ඇත.

වයස අවුරුදු 18 ට සම්පූර්ණ වීමට පෙර ඉන්දියානු කාන්තාවන් දෙකෝටි හතළිස් ලක්ෂයක් වසරකට විවාහ කෙරෙයි.

ඉන්දීය ආණ්ඩුවේ සමීක්ෂණයකට සහභාගී වූ ළමුන්ගෙන් 52.22% ක් කවර වූ හෝ ලිංගික අතවර පිළිබඳව පැමිණිලි කර ඇත.

ළමා දූෂණ සම්බන්ධයෙන් චෝදනා ලබන්නන්ගෙන් 50% ක් එම ළමුන් දන්නා හඳුනන හෝ ඔවුන්ට සමීප සබඳතා ඇති පුද්ගලයන් හෝ ඔවුන් බලා ගැනීමට ඉදිරිපත් වූවෝ වෙති.

(එම සංඛ්‍යා තොරතුරු ඉන්දියා ආණ්ඩුවේ සහ 'යුනිසෙෆ්' මූලාශ්‍ර මගිනි)